شاہ رخ خان اس وقت باکس آفس پر حکمرانی کررہے ہیں، ایسے میں ان کی فلم ’جوان‘ کے ہدایت کار کا کہنا ہے کہ کنگ خان کی ’ڈنکی‘ ان کی پچھلی فلموں سے آگے نکل جائے گی۔
جوان کی ہدایت کاری کے فرائض انجام دینے والے ساؤتھ کے مشہور ڈائریکٹر ایٹلی کمار نے اپنے خصوصی انٹرویو میں کنگ خان کی پٹھان، جوان اور آنے والی فلم ڈنکی کے بارے میں اپنے خیالات کا اظہار کیا ہے۔ انھوں نے کہا کہ راج کمار ہیرانی کی ’ڈنکی‘ ان کی حالیہ فلم ’جوان‘ سے کہیں زیادہ کامیابی حاصل کرے گی۔
بھارتی فلمی ویب سائٹ سے گفتگو کرتے ہوئے انھوں نے انکشاف کیا کہ ’ڈنکی‘ تمام فلموں سے آگے نکل جائے گی اور ایکو سسٹم کے تحت ایسا ہی ہونا چاہیے، کیوں کہ ہمیں آگے بڑھتے رہنا چاہیے اور پہلے سے بہتر کام پیش کرنا چاہیے۔
ساؤتھ سے تعلق رکھنے والے ہدایت کار نے کہا کہ ہر فلم پر پہلے سے زیادہ محنت کرنی چاہیے۔ ظاہر سی بات ہے مجھے اپنی پچھلی فلم کی کامیابی کو عبور کرنا ہوگا۔
انھوں نے کہا کہ یقیناً مجھے اپنی اگلی فلم جوان سے بہتر بنانا ہوگی، فلم کا ہر ٹیکنیشن اور ہر اداکار یہ بات جانتا ہے کیوں کہ دنیا کا ایکو سسٹم ہمیشہ ایسا ہی ہوتا ہے۔
ایٹلی نے کہا کہ جب ہم آگے بڑھتے ہیں تو سسٹم بھی پھیلتا ہے اور یہ ایک اچھی نشانی ہوتی ہے میرے خیال میں ’‘ڈنکی‘ حیرت انگیز کارکردگی دکھائی گے۔ میں شاہ رخ خان کے لیے بہت خوش ہوں۔ میرا نہیں خیال دنیا میں کسی اور کے پاس یہ ریکارڈ ہوگا۔
