لاہور: پی ٹی آئی چیئرمین عمران خان کا کہنا ہے کہ یہ نئی پارٹی بنانے جارہے ہیں جس میں پی ٹی آٗئی چھوڑنے والے جائیں گے۔

اے آر وائی نیوز کے مطابق چیئرمین پی ٹی آئی عمران خان کا کہنا ہے کہ کوئی پارٹی ملک میں تنہا حکومت نہیں بناسکتی، ن لیگ کا ان کو پتہ ہے کہ یہ گھوڑا بیٹھنے والا ہے، یہ لوگ نئی پارٹی بنا کر اتحادی حکومت بنانا چاہتے ہیں لیکن اتحادی حکومت مضبوط نہیں ہوتی کیونکہ فیصلے کا اختیار نہیں ہوتا، مضبوط حکومت وہ ہوتی ہے جس کے پیچھے عوام ہوتی ہے۔

انہوں نے کہا کہ چیئرمین نیب جس شخص کوبنایا اسے کہا گیا کہ پی ٹی آئی کیخلاف کیسز بنائیں، پولیس کی اکثریت بھی کہتی ہے کہ ظلم کیا جارہا ہے، پولیس کو ہدایت دی گئی ہے کہ جو بھی پی ٹی آئی والا ملے اندر ڈالو، گھر توڑ دیا جاتا ہے، کاروبار تباہ کر دیا جاتا ہے اور پکڑ کر جیلوں میں ڈال دیا جاتا ہے۔

عمران خان نے کہا کہ اس بار خود ٹکٹ دینے کی کوشش کی کہ نظریاتی لوگ سامنے آئیں۔

پی ٹی آئی چیئرمین نے کہا کہ ملک میں مہنگائی ہے، بے روزگاری میں اضافہ ہورہا ہے، قانون کی بالادستی نہیں ہوگی تو ملک نہیں بچے گا، ایسے حالات بنادیے گئے ہیں لوگ ملک چھوڑ کر جارہے ہیں۔

سابق وزیر اعظم اور چیئرمین پاکستان تحریک انصاف عمران خان نے جناح ہاؤس (کور کمانڈر ہاؤس لاہور) پر حملے کی تحقیقات کرنے والی جے آئی ٹی کو تحریری جواب دے دیا۔

جے آئی ٹی نے آج شام 4 بجے عمران خان کو تحقیقات کیلیے طلب کیا تھا مگر چیئرمین پی ٹی آئی کی جانب سے نامزد کردہ نمائندگان پیش ہوئے۔جے آئی ٹی نے نمائندوں کے ذریعے سابق وزیر اعظم کا جواب قبول کرنے سے انکار کر دیا۔

اس کے بعد عمران خان کی جانب سے تحقیقات میں شمولیت کیلیے تحریری بیان جمع کروا دیا گیا جس میں انہوں نے مؤقف اختیار کیا کہ 10 مئی کو درج مقدمے کی تحقیقات میں شمولیت کا نوٹس بھجوایا گیا، نوٹس کل موصول ہوا جس کے جواب کیلیے مہلت محدود تھی، طے شدہ شیڈول کے مطابق آج عدالتوں میں پیش ہونا تھا۔

عمران خان نے اپنے جواب میں لکھا کہ معاملے پر لاہور کی اے ٹی سی پہلے ہی ضمانت دے چکی ہے، جس روز واقعات ہوئے نیب کی غیر قانونی حراست میں تھا، سپریم کورٹ کے حکم پر مجھے رہا کیا گیا، جھوٹے مقدمات کے اندراج کے باوجود مکمل تعاون کر رہا ہوں، میرے خلاف دائر مقدمات جھوٹے اور غلط ہیں۔

متعلقہ: نو مئی واقعات پر جے آئی ٹیز تشکیل دے دی گئیں

چیئرمین پی ٹی آئی نے کہا کہ بنیادی حقوق کی خلاف ورزیوں کے باوجود تحقیقات کا حصہ بننے کیلیے تیار ہوں، علی اعجاز اور نعیم حیدر کو پیش ہونے اور تحقیقات میں شمولیت کیلیے مجاز بنا رہا ہوں، پاکستان کے 22ویں وزیر اعظم کے طور پر خدمات سر انجام دے چکا ہوں۔

’وزیر آباد میں قاتلانہ حملے کا نشانہ بھی بن چکا ہوں۔ سلامتی کو خطرات کے باوجود عدالتوں میں پیشی ناگزیر ہے۔ سکیورٹی اخراجات کے پیش نظر زمان پارک سے شمولیت قابل تحسین ہوگی۔ جے آئی ٹی کی جانب سے پہلے بھی ایسا کیا جا چکا ہے۔‘

تحریری بیان میں عمران خان نے لکھا کہ ہائی کورٹ کا لارجر بینچ بھی انتظامات کی ہدایات دے چکا ہے، ویڈیو لنک یا سوالنامے کے ذریعے تحقیقات میں شمولیت کی راہ میں رکاوٹ نہیں، زمان پارک سے بذریعہ ویڈیو لنک تحقیقات میں شمولیت مناسب رہے گی۔

پاکستان تحریک انصاف کے مرکزی رہنما و سابق وفاقی وزرا مراد سعید اور اعظم سواتی کی کی ممکنہ گرفتاری کے خلاف درخواست سماعت کیلیے مقرر کر دی گئی۔

پشاور ہائی کورٹ کی چیف جسٹس مسرت ہلالی اور جسٹس وقار احمد پر مشتمل دو رکنی بنچ کل درخواست پر سماعت کرے گا۔ درخواست سینئر قانون دان قاضی محمد انور نے دائر کی ہے۔

درخواست گزار نے مؤقف اختیار کیا کہ پولیس بغیر وجہ بتائے درخواست گزاروں مراد سعید اور اعظم سواتی کے گھروں پر چھاپے ما رہی ہے، انہوں نے پولیس اور فریقین سے مقدمات کی تفصیل فراہمی کیلیے درخواست دی لیکن ابھی تک تفصیل فراہم نہیں کی گئی۔

متعلقہ: مراد سعید کا اہم آڈیو پیغام سامنے آگیا

مزید کہا گیا کہ مقدمات کی تفصیل فراہم نہ کرنا غیر قانونی ہے۔

خیال رہے کہ 9 مئی پُرتشدد واقعات کے بعد قانون نافذ کرنے والے اداروں کی طرف سے مراد سعید کی گرفتاری کیلیے ان کی رہائش گاہ پر چھاپہ مارا گیا تاہم وہ تاحال روپوش ہیں۔

مراد سعید کا صدر مملکت ڈاکٹر عارف علوی کو خط

16 مئی کو مراد سعید نے صدر مملکت عارف علوی کو خط لکھ کر خود کو ملنے والی قتل کی دھمکیوں پر نوٹس لینے کی اپیل کی تھی۔

پی ٹی آئی رہنما نے خط میں لکھا تھا کہ صدر مملکت جھوٹے مقدمات، بوگس کیسز، قتل کی دھمکیوں اور حکومت کی ملی بھگت کا نوٹس لیں، 15 سال سے سیاست میں ہوں، ایم این اے اور وفاقی وزیر رہا لیکن کوئی کریمنل ریکارڈ نہیں، میرے خلاف اپریل 2022 کے بعد سے دہشتگردی سمیت متعدد جھوٹے کیسز کیے جا رہے ہیں۔

انہوں نے لکھا تھا کہ عمران خان کی غیر آئینی گرفتاری پر پارٹی نے پرامن احتجاج کی کال دی تھی، پارٹی کے دیگر رہنماؤں کی طرح میں نے پرامن احتجاج اور دھرنے کیلیے کہا، پارٹی گزشتہ 13 ماہ سے اس قسم کے احتجاج اور دھرنے دے رہی ہے۔

ان کا کہنا تھا کہ سب کو علم ہے کہ پی ٹی آئی کا احتجاج کہاں ہوتا ہے جیسا کہ لبرٹی لاہور، ہشتنگری پشاور اور نشاط چوک مینگورہ، 9 مئی کے بعد میرے اور ہمدروں کے خلاف عوام کو ریاست کے خلاف اکسانے کا مسلسل الزام لگایا جا رہا ہے۔

خط میں ان کا کہنا تھا کہ مجھ پر عمران خان کے ساتھ کھڑے ہونے پر بغاوت جیسے الزامات لگائے گئے، میرا مسلسل پیچھا کیا جا رہا ہے اور عدالتوں تک پہنچنے کا موقع نہیں دیا جا رہا، صدر مملکت وفاقی حکومت کو اس قسم کی انسانی حقوق کی خلاف ورزیوں کی اجازت نہ دیں، امید ہے کہ آپ معاملے پر اپنا کردار ادا کریں گے اور مناسب اقدامات کریں گے۔