معروف انگریزی جریدے دی اکانومسٹ کے انٹیلیجنس یونٹ نے پاکستانی معیشت سے متعلق رپورٹ جاری کر دی جس میں سیاسی عدم استحکام، سکیورٹی اور معاشی کمزوریوں کو بڑا مسئلہ قرار دیا گیا ہے۔

دی اکانومسٹ نے اپنی تازہ رپورٹ میں بتایا کہ مہنگائی اور ٹیکسوں کا بوجھ بڑھنے سے موجودہ حکومت مقبولیت کھو چکی، پاکستان کو چار سال میں 77.5 ارب ڈالر بیرونی قرضہ واپس کرنا ہے۔

روپے کی گراوٹ کے بارے میں رپورٹ میں پیشگوئی کی گئی ہے کہ ڈالر 2023 میں 291 روپے، 2025 میں 302 روپے تک ہو جائے گا جبکہ 2024 سے 2027 کے دوران روپیہ مزید کمزور رہے گا۔

اکانومسٹ رپورٹ کے مطابق شرح سود بھی مزید 2 فیصد بڑھ کر 23 فیصد تک ہو جانے کا امکان ہے، معاشی شرح نمو رواں سال 1.5 فیصد اور اگلے سال منفی 0.2 فیصد ہوگی، رواں سال مہنگائی 30.3 فیصد اور اگلے سال کم ہو کر 20.8 فیصد پر آ جائے گی۔

رپورٹ میں بتایا گیا کہ پاکستان میں بے روزگاری اس سال 9.6 فیصد اور اگلے سال بڑھ کر 9.9 فیصد ہو جائے گی۔ انٹیلیجنس یونٹ نے تجویز دی کہ ڈیفالٹ سے بچنے کے لیے پاکستان کو نیا آئی ایم ایف پروگرام لینا پڑے گا۔

علاوہ ازیں آج وزارت خزانہ نے قرضوں سے متعلق رپورٹ جاری کی ہے جس کے مطابق شرح سود بڑھنے کی وجہ سے قرضوں کا حجم بڑھا، ملک میں شرح سود اور ڈالر کا ایکسچینج ریٹ بڑھنے کی وجہ سے مہنگائی اور قرض دونوں میں اضافہ ہوا۔

رپورٹ میں پیشگوئی کی گئی کہ اس سال ملک میں مہنگائی 28.5 فی صد رہے گی، آئندہ مالی سال مہنگائی کی شرح 21 فیصد رہے گی، پاکستان کا پبلک ڈیبٹ تاحال رسک ہے، 2026 تک قرضہ معیشت کے 70 فیصد سے زائد رہنے کا خدشہ ہے جبکہ 2026 میں مہنگائی بڑھنے کی شرح 6.5 فی صد ہو سکتی ہے، ڈالر کا ایکسچینج ریٹ بھی 6 فی صد مزید بڑھنے کا امکان ہے۔

رپورٹ میں کہا گیا کہ رواں مالی سال معاشی شرح نمو محض 0.8 فیصد رہنے کا امکان ہے، رواں مالی سال بجٹ میں معاشی ترقی کی شرح 5 فی صد رکھنے کا ہدف تھا۔

جولائی تا دسمبر ڈالر کا ایکسچینج ریٹ 11 فی صد بڑھا، دسمبر 2022 تک پاکستان کا کُل قرضہ 55 ہزار 800 ارب روپے تھا اور اس میں مقامی قرضہ 62.8 فیصد ہے جبکہ غیر ملکی قرضہ 37.2 فی صد ہے۔ رپورٹ کے مطابق جولائی تا دسمبر 3.2 ارب ڈالر کا غیر ملکی قرضہ لیا گیا اور 2.7 ارب ڈالر واپس کیا گیا۔

مالی سال 2024 میں مہنگائی کی شرح 21 فی صد، اور معاشی ترقی کی شرح 3.5 فی صد رہنے کا امکان ہے، 2025 میں مہنگائی کے بڑھنے کی شرح 7.5 فی صد اور معاشی ترقی کی شرح 5 فی صد رہنے کا امکان ہے۔ جب کہ مالی سال 2026 میں معاشی ترقی کی شرح 5.5 فی صد رہے گی۔

پاکستان تحریک انصاف مذاکرات میں حکومت کے سامنے کیا ایجنڈا رکھے گی، اس متعلق تفصیلات حاصل کر لی گئیں۔

ذرائع نے اے آر وائی نیوز کو بتایا ہے کہ مذاکرات میں پی ٹی آئی حکومت پر قومی اسمبلی تحلیل کرنے کی تاریخ دینے پر زور دے گی، دراصل سابق وزیراعظم عمران خان جولائی تک قومی اسمبلی کی تحلیل چاہتے ہیں تاکہ ملک بھر میں ایک ساتھ الیکشن ہو سکیں۔

ذرائع نے مزید بتایا کہ عمران خان الیکشن کی تاریخ کو جولائی میں اسمبلی تحلیل کے ساتھ طے کرنا چاہتے ہیں، انہوں نے مذاکرات سے پہلے فون پر اپنی ٹیم کو آگاہ کیا جس میں ان کا کہنا تھا کہ جولائی کے بعد قومی اسمبلی کی تحلیل ہمیں قبول نہیں ہوگی۔

مذاکرات پی ٹی آئی اور حکومت کی جانب سے تشکیل کردہ کمیٹیوں کے درمیان پارلیمنٹ ہاؤس کے کمیٹی روم میں ہو رہے ہیں۔ حکومتی کمیٹی میں اسحاق ڈار، یوسف رضا گیلانی، سعد رفیق، نوید قمر اور کشور زہرا شامل ہیں جبکہ پی ٹی آئی نے اس کے لیے شاہ محمود قریشی، فواد چوہدری اور سینیٹر علی ظفر کا انتخاب کیا ہے۔

اسلام آباد: قومی اسمبلی اجلاس میں گیس میٹرز کا کرایہ بڑھنے پر توجہ دلاؤ نوٹس پر کسی نے توجہ نہ دی۔

تفصیلات کے مطابق اسپیکر راجا پرویز اشرف کی زیرصدارت ہونے والے اجلاس میں وزیراعظم شہبازشریف نے اعتماد کا ووٹ حاصل کیا تاہم اراکین نے عوامی ایشو کو نظرانداز کر دیا۔

جےیوآئی کی عالیہ کامران نے گیس میٹرز کا کرایہ بڑھنے پر ایوان میں توجہ دلاؤ نوٹس پیش کیا تو نوٹس پر جواب دینے کے لیے حکومت کا کوئی وزیر موجود ہی نہیں تھا۔

عالیہ کامران نے سوئی گیس میٹرز کا کرایہ بڑھانے پر ایوان میں بات کرنا چاہی مگر اسپیکر نے گیس میٹرز کرایہ کے معاملے کو قائمہ کمیٹی کو بھیجنے کی ہدایت کر دی۔

عالیہ کامران کا کہنا ہے کہ عوام کے پریشانی کےاہم مسئلےپر ایوان میں بات کرنے دی جائے۔

گیس میٹر کا کرایہ ماہانہ 40 روپے سے بڑھا کر 500 روپے کر دیا گیا

واضح رہے کہ گیس میٹرز کا ماہانہ کرایہ 40 روپے سے بڑھا کر 517 روپے کر دیا گیا ہے۔ صارف گیس استعمال نہ بھی کرے تو اسے ہر ماہ کم از کم بل 500 روپے دینا ہوگا، یہ چارجز جنوری 2023 سے لاگو ہوں گے، صارفین کو 3 ماہ کے بقایا جات میٹر، رینٹ اور گیس ٹیرف کی مد میں اضافی دینا ہوں گے۔

ترجمان سوئی ناردرن کے مطابق یہ اوگرا کا فیصلہ ہے جو لاگو کیا گیا ہے، یہ نومبر دسمبر میں 0.9 کیوبک ہیکٹر سے کم صارفین پر لاگو نہیں ہوگا، کم گیس استعمال والے صارفین میٹر رینٹ سے مستثنیٰ ہوں گے۔