اسلام آباد : عدالت نے اداروں میں بغاوت پر اکسانے کے کیس میں لیفٹیننٹ جنرل ریٹائرڈ امجد شعیب کو باعزت بری کرتے ہوئے فوری رہائی کا حکم دے دیا۔

تفصیلات کے مطابق اسلام آباد کہ ڈسٹرکٹ اینڈ سیشن کورٹ میں لیفٹیننٹ جنرل (ر) امجد شعیب کے خلاف کیس کی سماعت ہوئی۔

جوڈیشل مجسٹریٹ عباس شاہ نے کیس کی سماعت کی ، لیفٹیننٹ جنرل(ر)امجد شعیب کے وکیل میاں اشفاق عدالت میں پیش ہوئے۔

وکیل میاں علی اشفاق نے عدالت کو بتایا کہ لیفٹیننٹ جنرل(ر)امجد شعیب کیخلاف کسی بھی پبلک سرونٹ نےمقدمے کی درخواست نہیں دی، ان کے الفاظ پر کیس نہیں بن سکتا۔

وکیل کا کہنا تھا کہ لیفٹیننٹ جنرل(ر)امجد شعیب کےخلاف مقدمہ بوگس ہے، انھوں نے کسی کمیونٹی کیخلاف بات نہیں کی، لیفٹیننٹ جنرل(ر)امجد شعیب نے جو جو پروگرام پر کہا اسکو تسلیم کرتے ہیں۔

وکیل امجد شعیب نے کہا کہ اگر دوبارہ ہمیں بلایا جائے گا ہم پھر وہی بات کریں گے ، ہم ہر جگہ وہ بات کریں گے ،ہم اپنی بات پر قائم ہیں۔

وکیل میاں علی اشفاق کا کہنا تھا کہ پاکستان میں 6 لاکھ آرمی افسر ہیں ،کروڑوں کی تعداد میں سرکاری ملازمین ہیں، کروڑوں سرکاری ملازمین میں سے کس نے آکر آپ کو شکایت کی کہ ہم اس بیان سے متاثر ہوئے ہیں؟

وکیل امجد شعیب نے دلائل میں کہا کہ کتنا بڑا المیہ ہے ایک سابق جرنیل کے جیل کے کمرے میں کیمرہ لگا ہوا ہے،رات10بجے پروگرام چلا 11 بجے ختم ہوا ،پوری قوم سو رہی تھی، دوسرے دن بھی کروڑوں سرکاری ملازم سوتے رہے، کوئی ایک بھی درخواست لیکر نہیں آیا، کروڑوں سرکاری ملازمین نے امجد شعیب کی درخواست کی ایسی تشریح نہیں کی جو اویس خان نے کی۔

میاں علی اشفاق کا مزید کہنا تھا کہ میرے الفاظ اتنے سخت نہیں جتنے حکومت کے رویے ہیں، دفعہ 505 کے تحت یہ مقدمہ بنتا ہی نہیں ، سارا رونا دھونا الیکشن کرواؤ سے متعلق تھا اب تو سپریم کورٹ کا فیصلہ آگیا ، سپریم کورٹ نے فیصلہ دیا کہ الیکشن کروائیں ، اگر فیصلہ پہلے ہو چکا ہوتا تو ایسا پروگرام ہی نہیں ہوتا، پروگرام میں امجد شعیب کی جانب سے مثال کے طور کے الفاظ استعمال کیے گئے۔

لیفٹیننٹ جنرل(ر)امجد شعیب نے جج سے مکالمے میں کہا کہ میں نے ہمیشہ دھرنے اور لانگ مارچ کی مخالفت کی، ہمیشہ کہتا ہوں کہ کیا دھرنے سے یا لانگ مارچ سے کبھی کوئی حکومت گرائی ہے، میرا تجزیہ ہوتا ہے کبھی میرے تجزیے پر عمل نہیں ہوا۔

امجد شعیب کا کہنا تھا کہ میری کبھی کسی سیاسی لیڈر سے ملاقات نہیں ہوئی، توڑ پھوڑ سے ملک کو نقصان ہوتا ہے،اپنے ہی لوگ پریشان ہوتے ہیں، میں ہسٹری کی بات کر رہا تھا کہ کبھی دھرنوں، ریلی سے کچھ حاصل وصول نہیں ہوا۔

جس پر عدالت نے کہا کہ ہم اپنی ایف آئی آر میں آج بھی دیکھتے ہیں کہ للکارا کا لفظ استعمال ہوتا ہے، کیا یہ آپ کا للکارا تو نہیں تھا جس کی بنیاد پر مشورہ دیا گیا ہو ، آپ کا موقف سن لیا میرٹ پر دیکھ لیتے ہیں۔

وکیل میاں اشفاق نے امجد شعیب کو کو کیس سے ڈسچارج کرنے کی استدعا کرتے ہوئے کہا کہ امجد شعیب محب وطن اور اس ملک کے معزز شہری ہیں۔

سیشن عدالت نے امجد شعیب کو کیس سے باعزت بری کر دیا اور فوری طور پر رہا کرنے کا حکم دے دیا۔

کراچی : ادارہ تحفظ ماحولیات کی رپورٹ میں کراچی پورٹ پر خطرناک کیمیکلز کی موجودگی کا انکشاف سامنے آیا اور کہا گیا کہ باریک ذرات کی شکل میں پھیلے دھول کی وجہ سے آبادی کوخطرات لاحق ہیں۔

تفصیلات کے مطابق سندھ ہائی کورٹ میں کیماڑی کے علی احمد گوٹھ میں پراسرا ہلاکتوں کے معاملے پر سیپا رپورٹ کی روشنی میں پولیس کی تیار کردہ تحقیقاتی رپورٹ عدالت میں پیش کردی گئی۔

ادارہ تحفظ ماحولیات کی رپورٹ میں کراچی پورٹ پر خطرناک کیمیکلز کی موجودگی کا انکشاف سامنے آیا۔

پولیس رپورٹ میں بتایا گیا کہ سیپا ٹیم نے 17 فروری کو کے پی ٹی ٹرمینلز 15اور 16 پر دھواں آبزرو کیا ، ان ٹرمینلز پردرآمد شدہ مضرصحت خام مال کو خالی کیا جارہا تھا، ٹرمینلز پر طویل عرصہ سے موجود کنٹینرز میں خطرناک کیمیکلز پائے گئے۔

رپورٹ میں انکشاف ہوا ہے کہ خام مال اور سویابین کی وجہ سے متاثرہ علاقے میں ایئر کوالٹی 2.5 سے بڑھ کر10 تک خراب ہوگئی ہے۔

پولیس رپورٹ میں کہا گیا کہ خام مال اور سویابین کے باریک ذرات کی شکل میں پھیلے ہوئے دھول کی وجہ سے آبادی کو خطرات لاحق ہیں، کے پی ٹی کی بنیادی ذمہ داری ہے، ماحولیات سے متعلق قوانین پر مکمل عمل درآمد کرے۔

رپورٹ کے مطابق کے پی ٹی نے ماحولیات اور ایئر کوالٹی کو بہتر بنانے کیلئے اقدامات نہیں کیے، کے پی ٹی کی مجرمانہ غفلت کی وجہ سے پورٹ پر کام کرنے والے لوگ اور قریبی رہائشی علاقوں کے مکین زہریلی اور خطرناک گیسوں سے متاثر ہورہے ہیں۔

سیپا رپورٹ میں کہنا ہے کہ ہوا کا معیار انسانی صحت اور ماحول کے لیے انتہائی نقصان دہ پایا گیا ہے، پوسٹ مارٹم رپورٹ تاحال موصول نہیں ہوئی، تمام رپورٹس آنے پر موت کی وجہ معلوم ہوسکے گی، مرنے والوں کے ورثا کسی قسم کی قانونی کارروائی نہیں چاہتے۔

اسلام آباد : بجلی کا بل ادا کرنے والوں پر مزید بوجھ ڈالنے کی تیاری کرلی گئی، جس پر چیئرمین نیپرا نے کہا کہ جو بجلی کے بل نہیں دیتے وہ تو آج بھی مسکرا رہے ہیں۔

تفصیلات کے مطابق بجلی صارفین پر تین روپے انتالیس پیسے اضافی سرچارج لگانے کی حکومتی درخواست پر سماعت ہوئی۔

چیئرمین نیپرا نے شدید تحفظات کا اظہار کرتے ہوئے کہا کہ جو بیچارے بل ادا کرتے ہیں انہوں نے تین روپے انتالیس پیسے کا سرچارج دینا ہے اور جو بل نہیں دیتے وہ تو آج بھی مسکرا رہے ہیں۔

چیئرمین نیپرا کا کہنا تھا کہ کمپنیوں نے جو کام کرنے تھے وہ نہیں کئے تو اب عوام پر ہی سرچارج لگا رہے ہیں۔

نیپرا نے اضافی سرچارج کی منظوری قانونی رائے سے مشروط کر دی، چیئرمین نیپرا نے کہا کہ پاور ڈویژن پہلے اس پر قانونی رائے دے پھر منظوری کا فیصلہ ہوگا، جس پر پاورڈویژن حکام کا کہنا تھا کہ سرچارج کے نفاذ سے متعلق قانونی سوالات کا جواب پوچھ کر بتادیں گے۔

چیئرمین نیپرا نے مزید کہا کہ اگر نیپرا اس طرح ریکوری کی اجازت دے تو باقی طریقہ کار تو ختم ہوجائیں گے، نیپرا کے پاس سرچارج کی منظوری یا نامنظور کرنے کی پاور ہی نہیں؟ ہمیں سرچارج کے نفاذ پر حکومت کی لیگل پوزیشن درکار ہے، یہ طاقت حکومت کے پاس ہے تو باہر نکل کر ذمہ داری نیپرا پر نہ ڈالی جائے۔

ممبر نیپرا کا کہنا تھا کہ پاور ڈویژن کی نااہلی تو وہیں ہے مسئلہ ہر سال بڑھتا جائے گا، انڈسٹری کا ٹیرف بتیس روپے فی یونٹ تک پہنچ جائے گا اور اگر انڈسٹری متبادل آپشن پر چلی جائے تو پھر ریکوری کیسے ہوگی۔

نیپرا کے مطابق بجلی صارفین پر پہلے ہی تینتالیس پیسے فی یونٹ سرچارج عائد ہے ، اب حکومت اس سرچارج کو تین روپے بیاسی پیسے فی یونٹ تک لے جانا چاہتی ہے۔