پشاور: خیبر پختونخوا کے محکمہ تعلیم نے سردی کی لہر میں غیر معمولی اضافے کے پیشِ نظر اسکولوں کے لیے تعطیلات کا اعلان کر دیا۔

محکمہ تعلیم کی جانب سے جاری کردہ حکم نامہ کے مطابق میدانی علاقوں کے اسکولز 25 دسمبر سے یکم جنوری تک بند رہیں گے جبکہ سرمائی علاقوں میں 25 دسمبر سے 15 فروری تک چھٹیاں دینے کا فیصلہ کیا گیا ہے۔

محکمہ تعلیم نے بتایا کہ چھٹیاں دینے کا فیصلہ سردی کی شدت میں غیر معمولی اضافے سے مشروط تھا۔

لاہور: پاکستان پیپلز پارٹی کے شریک چیئرمین اور سابق صدر آصف علی زرداری کراچی کے لیے روانہ ہوگئے۔

اے آر وائی نیوز کے مطابق آصف علی زرداری نے دورہ لاہور مکمل کرلیا۔ وہ تقریباً ایک ہفتہ لاہور میں قیام پذیر رہے۔

سابق صدر پنجاب اسمبلی کو تحلیل سے بچانے کے لیے متحرک رہے جبکہ انہوں نے مختلف سیاسی جماعتوں کے سربراہان سے ملاقاتیں بھی کیں۔

آصف علی زرداری 27 دسمبر کو سابق وزیر اعظم بینظیر بھٹو کی برسی کے پروگراموں میں شریک ہوں گے۔

یہ بھی پڑھیں: نواز شریف اور آصف زرداری مجھ سے خوفزدہ ہیں، عمران خان

ذرائع کے مطابق آصف علی زرداری کو مشن لاہور میں خاطر خواہ کامیابی نہ مل سکی۔ وہ چوہدری شجاعت حسین کے ذریعے مسلم لیگ (ق) کے اراکین پنجاب اسمبلی نہ توڑ سکے۔

پی ٹی آئی کے ایم پی ایز کھل کر پارٹی کی مخالفت پر راضی نہ ہوئے جبکہ چوہدری شجاعت سے پرویز الٰہی کی گارنٹی لینے میں بھی ناکامی ہوئی۔

پاکستان تحریک انصاف کے مرکزی رہنما فواد چوہدری کا کہنا ہے کہ ہم پنجاب اسمبلی سے اعتماد کا ووٹ لینے جا رہے ہیں، ہمارے پاس اس وقت 187 ممبران موجود ہیں۔

لاہور میں پارٹی رہنماؤں کے ہمراہ میڈیا سے گفتگو میں فواد چوہدری نے کہا کہ ہمارے تمام ممبران وزیر اعلیٰ پنجاب کو ووٹ دیں گے، پرویز الٰہی اسمبلی توڑنے کے لیے تیار ہیں۔

فواد چوہدری نے کہا کہ ہم پنجاب اور خیبر پختونخوا میں الیکشن کرانے کے لیے تیار ہیں لیکن موجودہ حکومت عوام کے پاس نہیں جا سکتی، اگر عوام میں گئے تو انہیں ٹماٹر پڑیں گے۔

انہوں نے کہا کہ وفاقی وزرا بڑھکیں مار رہے تھے کہ اسمبلیاں توڑ دیں اور جب ہم اسمبلیاں توڑنے لگے تو سب بھاگ گئے، جب تک انتخابات نہیں ہوں گے ملک کے حالات بہتر نہیں ہو سکتے۔

ایک سوال کے جواب میں فواد چوہدری نے بتایا کہ چوہدری شجاعت حسین وزیر اعظم شہباز شریف سے ملتے رہتے ہیں لیکن ان ملاقاتوں کا ابھی اور آئندہ بھی کوئی فائدہ نہیں ہونا، چوہدری شجاعت کو ہم سے ملاقات میں فائدہ ہوگا۔

ان کا کہنا تھا کہ عمران خان کی کال پر پی ٹی آئی اراکین قومی اسمبلی نے استعفے دیے، ہمارے اراکین کے استعفے منظور ہونے چاہئیں۔

اسلام آباد: صدر مملکت ڈاکٹر عارف علوی نے وزیراعظم شہباز شریف اور چیف جسٹس آف پاکستان کو خط لکھ دیا جس میں کہا گیا ہے کہ مراد سعید کی شکایات کا ازالہ کیا جائے۔

اے آر وائی نیوز کے مطابق صدر مملکت ڈاکٹر عارف علوی کی جانب سے لکھے گئے خط میں کہا گیا ہے کہ سابق وزیر مراد سعید نے سوات کی بگڑتی صورت حال کا مسئلہ اٹھایا گیا جس کے بعد انہیں سنگین نتائج کی دھمکیاں دی جارہی ہیں۔

خط میں کہا گیا ہے کہ مراد سعید کی بار بار درخواستوں کے باوجود اسلام پولیس نے ایف آئی آر درج نہیں کی ہے۔

صدر کی جانب سے لکھے گئے خط میں کہا گیا ہے کہ ایسی کارروائیاں آئین اور قانون کے آرٹیکل 9 کی خلاف ورزی ہیں۔

ڈاکٹر عارف علوی نے مزید کہا کہ ’پوری ریاستی مشینری اپنے فرائض کی ادائیگی میں ناکام ہوئی ہے۔‘

اسلام آباد: الیکشن کمیشن آف پاکستان نے انتخابی ضابطہ اخلاق سے متعلق رولز سخت کرنے کے لیے ترامیم تیار کرلیں۔

الیکشن کمیشن نے الیکشن رولز 171 میں اہم تبدیلیاں تجویز کی ہیں۔ دستاویز کے مطابق انتخابی ضابطہ اخلاق کی خلاف ورزی اور جرمانے کی عدم ادائیگی پر جائیدادیں قرق ہوں گی، جرمانہ نہ جمع کرانے پر گرفتاری اور جائیداد نیلام کی جا سکے گی۔

مجوزہ رولز کے مطابق ضابطہ اخلاق کی خلاف ورزی پر جیل بھیجے بغیر دس روز تحویل میں لیا جائے گا، دس روز میں جرمانہ ادا نہ کیا تو ایک ماہ تک جیل بھی بھیجا جا سکے گا۔

اس میں مزید بتایا گیا کہ جیل بھیجنے کے باوجود جرمانے کی رقم ادا نہ کی تو غیر منقولہ جائیداد ضبط کر کے قرقی کی جا سکے گا، جرمانے کی عدم ادائیگی پر ان لینڈ ریونیو ایکٹ 1967 کے تحت سزائیں ہوں گی، ڈی آر او ان ایکٹ کی سیکشن 80 کے تحت سزائیں دے سکے گا۔