کراچی : اے آر وائی نیوز کے پروگرام ’سرعام‘ کی ٹیم نے اسٹنگ آپریشن کرکے قائد آباد کے پولیس افسران کی کرپشن کو بے نقاب کردیا۔
شہر قائد میں پولیس کے اعلیٰ افسران گٹکے اور منشیات کی فروخت کا سدباب کرنے کے بجائے رشوت لے کر فروخت کی اجازت دے رہے ہیں۔
تفصیلات کے مطابق کراچی کے ضلع شرقی کے علاقے قائد آباد اور اسٹیل ٹاؤن میں تعینات 3 رشوت خور ڈی ایس پیز کو رنگے ہاتھوں پکڑ لیا گیا۔
پروگرام ’سرعام‘ کی ٹیم نے اقرار الحسن کی سربراہی میں اسٹنگ آپریشن کرتے ہوئے گٹکے اور ایرانی تیل کی غیر قانونی فروخت کی پشت پناہی کرنے پر معطل کروایا۔
رپورٹ کے مطابق مذکورہ اعلیٰ افسران بھاری رشوت کے عوض ملزمان کو گٹکے اور ایرانی تیل فروخت کی اجازت دیتے تھے۔
اس حوالے سے کارروائی کرتے ہوئے ٹیم سرعام نے قائدآباد کے ڈی ایس پی غلام پرور کو رنگے ہاتھوں پکڑا، تو اس نے ٹیم سر عام کو قرآن کا واسطہ دے کر جان چھڑانے کی کوشش کی۔ ٹیم نے ڈی ایس پی جعفر بلوچ کو معطل کروایا تو اعلیٰ افسران نے دوبارہ بحال کردیا۔
رپورٹ میں انکشاف کیا گیا ہے کہ ڈی آئی جی ناصر آفتاب نے رسمی کارروائی کے بعد جعفربلوچ کو بحال کردیا، اس کے علاوہ ڈی ایس پی اسٹیل ٹاؤن نذر نے بھی رشوت لے کر گٹکے کی فروخت کی اجازت دے رکھی ہے۔
