کراچی: شہر قائد میں آن لائن فوڈڈیلیوری کے نام پر ڈکیتی کرنے والے گرفتار ملزم عبدالرؤف نے تہلکہ خیز انکشافات کردئیے۔

اے آر وائی نیوز کی رپورٹ کے مطابق گزشتہ روز کراچی کے علاقے فیروز آباد میں پولیس نے کارروائی کرتے ہوئے آن لائن فوڈ ڈیلیوری کے نام پر ڈکیتی کرنے والے ملزم کو گرفتار کرکے یونیفارم، باکس اور اسلحہ برآمد کیا تھا۔

ملزم عبدالرؤف نے بتایا کہ دس دن قبل فوڈ چین میں ملازمت اختیار کی تھی، پیسے نہیں تھے اس لیے ڈکیتی کی واردات کی، بیگ میں پستول ہونے کی وجہ سے کوئی شک نہیں کرتا تھا۔

ملزم کا کہنا تھا کہ 2011 میں اسلحہ خریدا تھا اور ڈکیتی کے دوران باکس میں پستول رکھ کر کارروائی کرتا تھا۔

دوسری جانب ایس ایس پی ایسٹ ساجد سدوئی کے مطابق ملزم گھروں کے دروازے بجا کر بہانے سے فوڈ سپلائی کا بتاتا تھا، ملزم کے دیگر ساتھیوں کی تلاش میں چھاپے مارے جارہے ہیں۔

ایس ایس پی ایسٹ کا کہنا تھا کہ گرفتار ملزم عبدالرؤف نے اسٹریٹ کرائم کی 21 وارداتوں کا اعتراف کیا ہے، پولیس کا کہنا تھا کہ ملزم کے خلاف مزید تحقیقات جاری ہے، ملزم کی نشاندہی پر دیگر ساتھیوں کو بھی گرفتار کیا جائے گا۔

بنوں: پاکستان ڈیمو کریٹک موؤمنٹ کی ریلی میں افغان طالبان کے جھنڈے لہرا دیے گئے جبکہ لرا وبر، یو افغان کے نعرے بھی لگائے گئے۔

اے آر وائی نیوز کی رپورٹ کے پاکستان ڈیموکریٹک موؤمنٹ (پی ڈی ایم) کے بنوں میں ہونے والے جلسے میں امیر حیدر ہوتی کی تقریر کے دوران ’لرا وبر، یوافغان‘ کے نعرے لگائے گئے۔

لرا وبر یو افغان کے نعرے کا مطلب اوپر کابل نیچے پشاور یعنی سب ایک ہی افغان ہے۔

پنڈال میں شرکا افغان طالبان کے جھنڈے بھی لے کر پہنچے جنہیں سب کے سامنے لہرایا گیا جبکہ شرکا نے ریاستی اداروں کے خلاف بھی نعرے بازی کی۔ ذرائع کے مطابق شرکا کو ریاستی اداروں اور لراوبر، یوافغان نعروں یا افغان طالبان کے جھنڈے لہرانے سے قیادت نے نہیں روکا۔

مزید پڑھیں: ’’بیان پر قائم ہوں، پنجابیوں سے معافی نہیں مانگی‘‘

یہاں سوال یہ پیدا ہوتا ہے کہ آخر کیوں پی ڈی ایم کے جلسے میں افغان طالبان کے جھنڈے لہرائے گئے اور کیوں لو اوبر یو افغان کے نعرے لگائے گئے؟۔

دوسری جانب وفاقی وزیر برائے مواصلات مراد سعید نے بنوں جلسے میں لگنے والے نعروں کی شدید مذمت کرتے ہوئے کہا ہے کہ ’پی ڈی ایم کےمقاصدکیا ہیں، اب سب کچھ سامنےآچکا ہے‘۔ انہوں نے کہا کہ ان لوگوں نے بلوچستان میں آزاد بلوچستان کے نعرے لگائے اور امن باڑ کو اکھاڑ پھینکنے کا مطالبہ کیا۔

مراد سعید کا کہنا تھا کہ پی ڈی ایم کراچی جلسے میں اردو بولنے والوں کے خلاف تقریر کی گئی، پنجاب میں جاگ پنجابی جاگ اور پھر پنجابیوں کے خلاف گفتگو کی گئی، اب کے پی میں پاکستان کےخلاف نعرےلگائےجارہےہیں۔

وفاقی وزیر کا کہنا تھا کہ اگر کوئی نادانی میں سازش کا حصہ بن رہا ہے تو ہمیں اُس کو روکنا ہوگا، یہ عمران خان کو طالبان اوریہودی ایجنٹ بولتےتھے، اب کھل کر تضادسامنے آرہے ہیں۔

لاہور: پنجاب کے دارالحکومت لاہور میں دو بہنوں کو اغوا کے بعد گلا کاٹ کر قتل کردیا گیا۔

اے آر وائی نیوز کی رپورٹ کے مطابق لاہور کے علاقے کاہنہ میں اغوا کے بعد قتل کی جانے والی دو بہنوں کی لاشیں نالے سے برآمدکرلی گئیں،پولیس کے مطابق دونوں بہنوں کو گلا کاٹ کر قتل کیا کیا۔

ذرائع کے مطابق کاہنہ کی 26 سالہ عابدہ اور 28 سالہ ماجدہ 26 نومبر کو بازار گئیں اور پھر گھر نہ لوٹیں۔

پولیس کے مطابق بارہ دسمبر کو عابدہ اور 4 جنوری کو ساجدہ کی لاشیں نالے سے برآمد ہوئیں، دونوں کے ہاتھ پاؤں باندھ کر گلے کاٹے گئے تھے۔

پولیس کا کہنا ہے کہ ورثا نے محلے دار نعیم نامی شخص پر قتل کا شبہ ظاہر کیا ہے، ملزم نعیم عبوری ضمانت کرواکر عدالت نہ پہنچا اور فرار ہوگیا، ملزم کے ورثا بھی گھروں کو تالے لگا کر غائب ہوگئے۔

پولیس کا کہنا ہے کہ واقعے کی تحقیقات جاری ہیں، ملزم کی تلاش میں چھاپے مارے جارہے ہیں، دوسری جانب آئی جی پنجاب نے واقعے کا نوٹس لیتے ہوئے سی سی پی او سے رپورٹ طلب کرلی۔