اسلام آباد : آئل اینڈ گیس ڈویلپمنٹ کمپنی لمیٹڈ میں 170 ملازمین کے جعلی ڈگریوں پر بھرتی ہونے کا انکشاف ہوا ہے جن میں پانچ کو جبری ریٹائڑڈ کردیا گیا ہے.

اس بات کا انکشاف پارلیمنٹ کی پبلک اینڈ اکاؤنٹس کمیٹی کے اجلاس میں او جی ڈی سی کی آڈٹ رپورٹ میں کیا گیا جس پر چیئرمین کمیٹی خورشید شاہ اور دیگر اراکین نے برہمی کا اظہار کیا.

اس موقع پر آڈٹ حکام نے شرکاء کو بریفنگ دیتے ہوئے بتایا کہ جعل سازی کے ذریعے ملازمتیں حاصل کرنے والے 170 ملازمین اور افسران میں سے 5 کو تمام مراعات کے ساتھ جبری ریٹائرمنٹ دے دی گئی ہے جب کہ 18 ملا زمین کی تنزلی کی گئی جبکہ 80 ملازمین کا مقدمہ عدالت میں زیر التواء ہے.

آڈٹ حکام نے یہ انکشاف بھی کیا کہ مذکورہ اعداد و شمار او جی ڈی سی ایل کے 15 ہزار ملازمین کی تصدیق کے بعد سامنے آئے ہیں جب کہ کمپنی کے منیجنگ ڈائریکٹراور دیگر بعض ملازمین نے تعلیمی سرٹیفکیٹ میں ٹیمپرنگ کی جن میں تاریخ پیدائش، ڈویژن یا گریڈ میں تبدلی کی گئی.

خیال رہے سرکاری محکموں میں جعلی اسناد پر بھرتیوں کا معاملہ زور پکڑتا جا رہا ہے اور وفاقی اداروں سمیت صوبائی اداروں میں کئی ملازمین نے جعل سازی کر کے ملازمے حاصل کر رکھی ہے اور یہ نااہل ملازمین نہ صرف یہ کہ خزانے پر بوجھ ہوتے ہیں بلکہ ادارے کی کارکردگی بھی ٹھپ ہوجاتی ہے.

اسلام آباد : قومی ٹیلی ویژن کے ڈائریکٹر انفارمیشن ٹیکنالوجی اور اُن کی اہلیہ اپنے گھر میں مردہ پائے گئے ہیں تاحال موت کی وجہ کا تعین نہیں کیا جا سکا ہے۔

تفصیلات کے مطابق 55 سالہ فخر حمید اور ان کی اہلیہ حمیرا حمید کی لاشیں گھر کے باتھ روم سے برآمد ہوئی ہیں۔

فخر حمید پاکستان ٹیلی ویژن میں بہ طور ڈائریکٹر انفارمیشن ٹیکنالوجی کے فرائض انجام دے رہے تھے اور اپنی اہلیہ اور بیٹی کے ہمراہ صادق آباد میں داتا گنج بخش روڈ کے قریب گھر میں رہائش پزیر تھے۔

پولیس کا کہنا ہے کہ واقعہ کی اطلاع فخر حمید کی سات سالہ بیٹی نے دی جس نے اسکول سے واپسی پر اپنے والدین کی باتھ روم میں مردہ حالت میں پایا۔

پولیس کا کہنا تھا کہ تاحال موت کی وجہ کا تعین نہیں کیا جاسکا ہے تاہم وقوعہ کا مختلف پہلوؤں پر تحقیقات کی جا رہی ہیں اور جلد ملزمان تک پہنچ جائیں گے۔

دوسری جانب پوسٹ مارٹم رپورٹ کے مطابق فخر حمید کا انتقال باتھ روم میں پھسل جانے اور سر فرش پر ٹکرانے کی وجہ سے ہوا جس پر اُن کی اہلیہ مدد کو پہنچی لیکن اپنے شوہر کو مردہ حالت میں دیکھ کر دل کا دورہ پڑنے کے سبب خالق حقیقی سے جا ملیں۔