گھوٹکی: سندھ کے شہر گھوٹکی میں محکمہ جیل کا پولیس اہلکار اپنے دو بچوں کو فروخت کرنے کے لیے ڈسٹرکٹ جیل کے گیٹ پر پہنچ گیا۔

اے آر وائی نیوز کے مطابق سندھ کے شہر گھوٹکی میں محکمہ جیل کے پولیس اہلکار نے افسران کی مبینہ ناانصافی کے خلاف چیخ و پکار کی اور جیل کے گیٹ پر بچوں کو فروخت کرنے کے لیے آوازیں لگانا شروع کردیں۔

پولیس اہلکار نثار لاشاری کا کہنا تھا کہ جیل کے افسران کی زیادتیوں نے بچے فروخت کرنے پر مجبور کردیا۔

پولیس اہلکار کا کہنا تھا کہ 17 نومبر کو بچے کا گمبٹ کے اسپتال میں آپریشن ہے، چھٹی کے لیے رشوت مانگی گئی، ہیڈ محرر عزیز نے رشوت نہ دینے پر لاڑکانہ جیل تبادلہ کرادیا۔

نثار لاشاری نے کہا کہ کوئی میرے بچے پچاس ہزار روپے میں خریدے تو افسران کو رشوت دے سکوں گا.

نمائندہ اے آر وائی نیوز کے مطابق پولیس اہلکار کا کہنا تھا کہ ہیڈ محرر سے پندرہ دن کی چھٹی طلب کی گئی تو مجھ سے بیس ہزار روپے رشوت مانگی گئی۔

ذرائع کا کہنا ہے کہ پولیس اہلکار کی ویڈیو سوشل میڈیا پر وائرل ہونے کے باوجود کسی افسران کی جانب سے اہلکار کی مدد نہیں کی گئی اور نہ ہی ہیڈ محرر کے خلاف کوئی ایکشن لیا گیا ہے۔

کراچی: پاکستان ڈیمو کریٹک موومنٹ (پی ڈی ایم) کے سربراہ مولانا فضل الرحمان کا کہنا ہے کہ پی ڈی ایم ملکی بقا کی جنگ لڑ رہی ہے اور ہم اس میں کامیاب ہوں گے۔

اے آر وائی نیوز کے مطابق کراچی کے علاقے صدر ریگل چوک پر پی ڈی ایم کے مہنگائی کے خلاف احتجاجی مظاہرے سے مولانا فضل الرحمان نے خطاب کرتے ہوئے کہا کہ موجودہ حکمرانوں کو پتا ہی نہیں ملک کو کیسے چلاتے ہیں، ملک میں عوام کی حقیقی حکومت آئے گی۔

انہوں نے کہا کہ آج کراچی سے سفر شروع ہوا ہے اسلام آباد میں اختتام پذیر ہوگا، مہنگائی کے ہاتھوں عوام نے بچے فروخت کرنا شروع کردیے ہیں، پارلیمنٹ لاجز کے سامنے لوگوں نے بچے برائے فروخت رکھے ہیں، پولیس جوان اپنے بچے 50 ہزار روپے میں فروخت کا اعلان کرتا ہے، بھوک کی وجہ سے لوگ خودکشیاں کرنے پر مجبور ہیں۔

فضل الرحمان نے کہا کہ پہلے ہی کہا تھا کہ یہ حکومت چوری کے ووٹ سے آئی ہے، پہلے دن کہا تھا یہ حکومت نااہل، ناجائز اور نالائق ہے، حکومت کو بحیرہ عرب میں غرق نہیں کیا تو ملکی بقا کا سوال بنے گا۔

پی ڈی ایم سربراہ نے کہا کہ آج اس ملک کو کہاں پہنچایا جارہا ہے، کبھی سعودی عرب، کبھی چین سے بھیک مانگ رہے ہیں، ہر جگہ موجودہ حکمرانوں کے ہاتھوں قوم کی بدنامی ہورہی ہے، موجودہ حکمرانوں کو قوم پر حکمرانی کا کوئی حق نہیں ہے۔

فضل الرحمان نے کہا کہ پاکستان تنہائی کی طرف جارہا ہے، نوجوان، مزدور، چھوٹا دکاندار اور ہر کاروباری شخص مایوس ہے، پی ڈی ایم قوم کی امید اور آواز ہے، عوام ہمارے شانہ بشانہ ہوں گے۔

کراچی: مسلم لیگ ن کے سینئر رہنما شاہد خاقان عباسی نے ملک میں مسائل کے حل کے لیے فوری صاف شفاف انتخابات کا مطالبہ کردیا۔

اے آر وائی نیوز کے مطابق کراچی کے علاقے صدر ریگل چوک پر مسلم لیگ ن کے رہنما شاہد خاقان عباسی نے پی ڈی ایم کے احتجاجی مظاہرے سے خطاب کرتے ہوئے کہا کہ ملک کے مسائل کا حل صاف شفاف انتخابات ہیں۔

شاہد خاقان عباسی نے کہا کہ آج تمام لوگ ایک بات پر متفق ہیں کہ ملک کا نظام آئین کے مطابق ہو، ملک میں مہنگائی سے ہر شخص پریشان ہے۔

انہوں نے کہا کہ آج ہر شخص کی پریشانی کی وجہ 2018 الیکشن کی چوری ہے، پی ڈی ایم کا مطالبہ ہے کہ فوری انتخابات کرائے جائیں۔

واضح رہے کہ کراچی میں پی ڈی ایم کا مہنگائی کے خلاف احتجاجی مظاہرہ جاری ہے، مولانا فضل الرحمان احتجاجی مظاہرے میں پہنچ گئے ہیں، مظاہرے میں شاہد خاقان عباسی، محمد زبیر، محمود خان اچکزئی ودیگر موجود ہیں۔

پی ڈی ایم رہنما اویس نورانی نے احتجاجی مظاہرے سے خطاب کرتے ہوئے کہا کہ مہنگائی کے خلاف 17 نومبر کو کوئٹہ میں احتجاجی مظاہرہ ہوگا، 20 نومبر کو پشاور میں مظاہرہ کیا جائے گا۔