اسلام آباد : پاکستان تحریک انصاف نے ہفتے کو انٹرا پارٹی الیکشن کرانے کا اعلان کردیا ، چیئرمین پی ٹی آئی انٹرا پارٹی الیکشن نہیں لڑیں گے۔
تفصیلات کے مطابق پاکستان تحریک انصاف کے رہنما بیرسٹر علی ظفر نے پریس کانفرنس کرتے ہوئے کہا کہ 2022 میں پی ٹی آئی نے انٹراپارٹی الیکشن کرائے تھے ،الیکشن کمیشن نے دوبارہ انٹراپارٹی الیکشن کرانے کا حکم دیا، 2022میں کرائےگئے انٹراپارٹی الیکشن کی تفصیل الیکشن کمیشن کو دی تھی لیکن الیکشن کمیشن نے زبانی فیصلہ سنایا اس کےبعدپھر تحریری فیصلے میں تاخیر ہوئی۔
بیرسٹر علی ظفر کا کہنا تھا کہ الیکشن کمیشن کا 20دن میں انٹراپارٹی الیکشن کرانے کافیصلہ غیر آئینی اور غیر قانونی ہے،ہمارے پاس دو راستے تھے الیکشن کمیشن کافیصلہ چیلنج کرتے یا انٹراپارٹی الیکشن کراتے، ہم انٹراپارٹی الیکشن بھی کرائیں گے اور الیکشن کمیشن کا فیصلہ چیلنج بھی کریں گے۔
انھوں نے کہا کہ چیئرمین پی ٹی آئی فوراً انٹراپارٹی الیکشن کرانے کی منظوری دی ہے، کل پارٹی نے فیصلہ کیا ہے اس ہفتے کو انٹراپارٹی الیکشن کرارہےہیں۔
چیئرمین پی ٹی آئی سے ملاقات کا احوال بتاتے ہوئے بیرسٹر علی ظفر کا کہنا تھا کہ چیئرمین پی ٹی آئی الیکشن میں حصہ لیں یا نہیں اس پر قانونی رائے مانگی گئی ، چیئرمین پی ٹی آئی کیخلاف توشہ خانہ کیس میں سزا سنائی گئی جو غیر قانونی ہے، توشہ خانہ کیس میں شہادت اور دفاع کا موقع نہیں دیا گیا تھا۔
انھوں نے مزید کہا کہ توشہ خانہ کیس میں سزاسنائی گئی جوغیرآئینی اورغیرقانونی ہے،توشہ خانہ کےتحائف ڈکلیئر نہ کرنے پر نااہلی نہیں بنتی ، توشہ خانہ کیس معطل ضرور ہوا ہے مگر حتمی فیصلہ اس پر ابھی نہیں ہوا ہے۔
وکیل پی ٹی آئی نے بتایا کہ چیئرمین نے کہا کوئی خطرہ نہیں لینا چاہتاکہ الیکشن میں پی ٹی آئی کے انتخابی نشان اور الیکشن سے دور کرنے کی اجازت نہ دے۔
ان کا کہنا تھا کہ چیئرمین پی ٹی آئی نے کہا توشہ خانہ کیس کا جلد سے جلد فیصلہ ہو، توشہ خانہ کیس کے فیصلے کے بعد دوبارہ پارٹی کے الیکشن میں حصہ لوں گا، انٹراپارٹی الیکشن کی اہمیت نہیں، عام انتخابات لڑناچاہتا ہوں، چیئرمین پی ٹی آئی انٹراپارٹی الیکشن میں عارضی طورپر حصہ نہیں لیں گے۔
