کراچی کے علاقے ڈیفنس خیابان بدر سے 8 سالہ بچے عبداللہ کے اغوا کا ڈراپ سین ہوگیا۔

اے آر وائی نیوز کے مطابق ایس پی کلفٹن احمد چوہدری کا کہنا ہے کہ میاں بیوی میں جھگڑا ہوا تھا جس کے بعد ماں بچے کو ہری پور لے کر چلی گئی۔

ایس پی کلفٹن کا بتانا ہے کہ بچہ والدہ کے پاس ہری پور میں موجود ہے جبکہ بچے کی ماں نے عبداللہ سے پولیس کی بات کروائی ہے۔

پولیس کے مطابق بچے کی ماں نے بیان دیا کہ شوہر دو سال سے نامناسب رویہ رکھتا تھا، تشدد کا نشانہ بناتا تھا اور کردار کشی کے لیے ذہنی ٹارچر کرتا تھا۔

خاتون نے پولیس کو دیے گئے بیان میں بتایا کہ وہ آبائی گاؤں ہری پور آگئی ہیں اور بیٹے عبداللہ کو بھی ساتھ لے کر آئی ہیں۔

واضح رہے کہ بچے کے اغوا کا مقدمہ بچے کے والد ملک وقاص کی مدعیت میں گزری تھانے میں درج ہے۔

چیئرمین پی ٹی آئی عمران خان اور سابق وزیراعلیٰ پنجاب پرویز الٰہی میں پنجاب اور خیبر پختونخوا میں انتخابی سرگرمیاں فوری طور پر تیز کرنے پر اتفاق ہوگیا۔

پرویز الٰہی نے زمان پارک لاہور میں عمران خان سے ملاقات میں انہیں سپریم کورٹ کے فیصلے پر مبارکباد دی۔ دونوں رہنماؤں میں پارٹی کے آئندہ لائحہ عمل پر مشاورت ہوئی۔

ملاقات میں عمران خان کا کہنا تھا کہ سپریم کورٹ کا فیصلہ خوش آئند اور آئین کی بالادستی کا عکاس ہے، قوم نے آئین کی بالادستی کیلیے جو جدوجہد کی وہ رنگ لائی ہے۔

سابق وزیراعظم نے کہا کہ تحریک انصاف انتخابی مہم میں اب تیزی لائے گی، سپریم کورٹ نے 90 روز میں انتخابات کا حکم دے کر آئین کی سپرمیسی برقرار رکھی، تحریک انصاف کے رہنما اور کارکن بھرپور انداز سے انتخابی مہم شروع کریں۔

اس موقع پر پرویز الٰہی کا کہنا تھا کہ فیصلے کے بعد اب بلا تاخیر متعلقہ ادارے عمل درآمد کیلیے اقدامات کریں، آئین ہی سپریم ہے یہ بات پی ڈی ایم کو بھی جان لینی چاہیے، ملک کو نواز، شہباز یا مریم کی خواہشات پر نہیں آئین کے مطابق ہی چلنا ہے۔

پرویز الٰہی نے کہا کہ معزز عدلیہ مریم نواز کے عدلیہ پر حملوں کا بھی نوٹس لے۔، سابق اٹارنی جنرل انور منصور خان کے خط پر کارروائی عمل میں لائی جائے، شہباز شریف اور مریم نواز اینڈ کمپنی نے الیکشن سے بھاگنے کی بھی بہت کوشش کی، عدلیہ نے فیصلے میں واضح بتا دیا کہ 90 روز میں الیکشن آئین کی منشا ہے۔

انہوں نے کہا کہ عمران خان پنجاب اور کے پی میں پہلے سے زیادہ اکثریت سے حکومتیں بنائیں گے، ان کی سیاسی مقبولیت کا مقابلہ کرنے کی پی ڈی ایم میں ہمت نہیں، روزانہ انتقامی بنیاد پر مقدمات بنائے جا رہے ہیں۔

آسٹریلیا کے مایہ ناز آف اسپنر ناتھن لائن نے بھارت کے خلاف ٹیسٹ کو یادگار بناتے ہوئے ایک اور اعزاز اپنے نام کر لیا۔

تجربہ کار آسٹریلیائی اسپنر ناتھن لائن آسٹریلیا کی جانب سے تیز ترین 500 وکٹیں لینے والے دوسرے بولر بن گئے ہیں۔
آسٹریلوی بولرز میں تیز ترین 500 انٹرنیشنل وکٹیں لینے والے لیجنڈری لیگ اسپنر شین وارن پہلے نمبر پر ہیں۔

ناتھن لائن 252 ویں اننگز میں اس اہم مقام پر پہنچے ہیں۔ انہوں نے بھارت کے خلاف سیریز کے تیسرے ٹیسٹ میں یہ سنگ میل عبور کیا ہے۔

اس فہرست میں پہلے نمبر پر موجود شین وارن نے 244 اننگز میں اور تیسرے نمبر پر فاسٹ بولر مچل اسٹارک نے 256 اننگز میں 500 وکٹیں حاصل کیں تھیں۔

سابق فاسٹ بولر گلین میک گراتھ نے 258 اننگز اور بریٹ لی 267 اور مچل جوہنسن نے 272 اننگز میں کارنامہ انجام دیا تھا۔

اسلام آباد: الیکشن کمیشن آف پاکستان نے سیاسی جماعتوں سے انتخابی نشان الاٹ کرنے کیلیے درخواستیں طلب کر لیں۔

الیکشن کمیشن کا کہنا ہے کہ سیاسی جماعتیں نمائندوں کے ذریعے انتخابی نشان کیلیے درخواستیں جمع کرائیں، درخواستیں 8 مارچ تک سیکریٹری الیکشن کمیشن کو بھیجی جا سکتی ہیں۔

کمیشن نے کہا کہ تاخیر سے بھیجی گئی درخواستوں پر غور نہیں کیا جائے گا، درخواستوں کے ساتھ بیان حلفی بھی جمع کرانا ہوگا۔

درخواستیں الیکشن ایکٹ 2017 کے سیکشن 216 کے تحت 8 مارچ تک طلب کی گئیں۔

دوسری جانب سپریم کورٹ کے فیصلے کے بعد الیکشن کمیشن نے صدر اور گورنر کے پی کے ساتھ مشاورت دوبارہ شروع کرنے کا فیصلہ کر لیا۔ الیکشن کمیشن میں اہم اجلاس ہوا جس میں چیف الیکشن کمشنر کی سربراہی میں ممبران و سیکرٹری نے شرکت کی۔

ذرائع کے مطابق الیکشن کمیشن کے لاؤنگ نے سپریم کورٹ کے فیصلے پر بریفنگ دی جبکہ پنجاب اور خیبرپختونخوا کے انتخابات کے حوالے سے مشاورت کی گئی۔ اجلاس میں متعلقہ ونگز نے الیکشنز کی تیاریوں بارے میں بھی بریفنگ دی۔

ذرائع کا کہنا ہے کہ الیکشن کمیشن نے صدر مملکت اور گورنر خیبرپختونخوا کے ساتھ مشاورت دوبارہ شروع کرنے کا فیصلہ کرلیا۔

یاد رہے سپریم کورٹ نے الیکشن کمیشن کو پنجاب اور خیبر پختونخوا میں نوے روز میں انتخابات کرانے کا حکم دے دیا ہے۔ سپریم کورٹ نے فیصلہ تین دو کی اکثریت سے سنایا، عدالتی فیصلے میں کہا گیا ہے کہ پارلیمانی جمہوریت میں انتخابات اہم عنصر ہیں، اسمبلی کی تحلیل کے بعد نوے روزمیں الیکشن ہونا لازم ہے۔

اسلام آباد: وزیراعظم شہباز شریف سے کنوینر خالد مقبول صدیقی کی قیادت میں ایم کیو ایم وفد کی ملاقات کا اندرونی احوال سامنے آگیا۔

اے آر وائی نیوز کے مطابق ذرائع کا بتانا ہے کہ ملاقات میں ایم کیوایم کے خود شماری کی تاریخ میں توسیع کے مطالبے کو اصولی طور پر تسلیم کر لیا گیا، ایم کیو ایم کے خانہ شماری تین دن کے بجائے 10 دن کرنے کے مطالبے پر بھی اتفاق ہوگیا۔

ملاقات میں اتفاق ہوا کہ کثیرالمنزلہ عمارتوں کے صدر دروازے کے بجائے ہر فلیٹ پر ’م شین‘ لکھا جائے گا۔

ملاقات میں مردم شماری کے حوالے سے ایم کیو ایم کے تمام مطالبات کی اصولی منظوری دے دی گئی جبکہ متعلقہ حکام کو باضابطہ حکم نامہ جاری کرنے کی ہدایت کر دی گئی۔

ایم کیو ایم وفد نے آج اسلام آباد میں وزیراعظم شہباز شریف سے ملاقات کے دوران ملک میں بڑھتی مہنگائی پر شدید تحفظات کا اظہار کیا۔ ملاقات میں ملکی سیاسی صورت حال اور ایم کیو ایم کے معاہدوں پر عمل درامد کے حوالے سے تحفظات پر بات چیت کی گئی۔

ایم کیو ایم کا مؤقف تھا کہ موجودہ حالات میں مہنگائی کا طوفان غریب عوام کو مزید متاثر کرے گا۔ خالد مقبول نے پیپلز پارٹی کی جانب سے معاہدہ پورا نہ ہونے کا شکوہ بھی کیا۔ وفد نے کہا کہ پیپلز پارٹی متعدد بار وعدوں اور یقین دہانیوں کے باوجود بات پوری نہیں کرتی۔